(என் பாடல்களில் எனக்குப் பிடித்த ஒன்று இக் கவிதை
முது பெரும் ஓவியர் மதிப்பிற்குரிய திரு.கோபுலு அவர்களின்
சித்திரம் என் கவிதைக்கு மெருகூட்டுகிறது . நன்றி !)

பச்சை மணிக்கிளி பாய்கிற தோளில் என்
பார்வை பதித்திடவோ – அட
விச்சை இருபது விளைந்தது வேஎன
விண்ணில் உதித்திடவோ

உச்சித் திலகத்தி லூறி வருமொளி
ஓடிக் களித்திடவோ – இவள்
முச்சுடர் கண்ஒளி மொட்டு விரியுது
மூழ்கிக் குளித்திடவோ

செண்டு மணிக்கரம் மொண்டு வரும்மணம்
சித்தம் உருக்கவரும் – அது
மண்டிக் கிடப்பதை உண்டு மனக்கிளி
மத்தம் பிடித்துவிடும்

தெண்டனிட் டேனடி என்றைக்கு எனதுளம்
சிற்றம்ப பலம்உறுமோ – இவள்
சுண்டு விரல்நுனி கொண்டு உலகத்தைச்
சுற்றி வலம் வருமோ

திங்கள் மதிமுகச் செங்கம லத்திலோர்
சிந்து பிறந்துவரும் – மிரு
தங்கம் முழங்கிட பங்கயக் கால் மணிச்
சங்கம் நடந்துவரும்

அங்கயற் கண்ணியின் மங்கலச் சொல்லுக்கென்
ஆவி கரைகிறது – அட
குங்குமச் சாந்துகு லுங்கித் தரும் துகள்
கூவி யழைக்கிறது

கற்றை முடிக்குழல் சுற்றி விசிறிடக்
காற்று மிதந்துவர – இவள்
கொற்றக் குடைக்குள் குடிபுகுந் தேன் எமக்
கூற்றை உதைத்துவிட

முற்றம் ஜொலிப்பதற் காகவென் நன்றிகள்
மூக்குத்திப் பொன்னொளிக்கு – என்
குற்றம் பொறுத்தெனைப் பற்றிக் கொண்டால்விழி
கூசிடும் தண்ணொளிக்கு

வீசிய வீச்சுக்கள் கண்ணொளிக் கேவிதி
வீறிட் டலறுது பார் – இவள்
பேசிய பேச்சில் என் பீடும் பெருமையும்
பீறிட்டு உயருதுபார்

மாசில் மணிக்கிளி தோள்விட்டு வந்தெந்தன்
மாடியில் பேசுது பார் – இவன்
தேசம் பரந்தது தேவிகு ழல்தென்றல்
தேடியே வீசுது பார்

மங்கல மங்கைஅங்கயற் கண்ணி
வலமே வருகின்றாள்
வலக்கால் எடுத்து வைத்தென் வீட்டுப்
புலமே வருகின்றாள்

திங்கட் செல்வி திரிபுரத் தரசி
சேவடி தருகின்றாள்
சேவிப் பேற்குத் தினந்தினம் புதுப் புது
பா வடி தருகின்றாள்

சங்கத் தமிழ்மது ராந்தகி நம்மனை
தங்கிட வருகின்றாள்
தங்க நிறத்தில்எம் மேனி ஜொலித்திடத்
தவமே புரிகின்றாள்

கங்குலி லும்பகல் எங்கணும் நாம்செலக்
காவலில் வருகின்றாள்
கால்வலி மேல்வலி யாஎனில் ஒத்தடம்
கைவழி தருகின்றாள்

மலயத் துவசன் மாமக ளுக்கு
மதுரையி லாவாசம் ?
மணக்குது மணக்குது மனைபோந் ததனால்
மல்லிகைப் பூவாசம்

நிலைபெற் றாள் எம் நெஞ்சக் கூட்டில்
நித்திய சகவாசம்
நெத்தியி லேநடு மத்தியிற் படுவது
நித்திலத் தாள்சுவாசம்

தலைச்சங் கத்துத் தமிழ்ப்பெரு மாட்டி
சதங்கையில் மொழிபேசும்
சங்கீ த்த்தை எவ்வணம் சொல்ல
சரிகம உல்லாசம்

விலகிவி டாமல் வியாபித் தாள்எனுள்
விரிந்தது ஆகாசம்
வெட்ட வெளிக்குள் விழிகண் கூசுது
வெளிச்சப் பிரகாசம்

——————————————-

மேலே உள்ள மீனாட்சி திருப்பாடல்
எழுத யான் எடுத்த நேரம் அரைமணித் தியானம் மட்டுமே

ஆனால் அதற்கும் மேலே உள்ள சித்திரத்தை வரைய
எனக்கு ஆறு மணித் தியானம் பிடித்தது

அப்புறம் ஸ்கேனிங், அளவைச் சிறிதாக்கல் என
மொத்தம் ஏழு மணித் தியான உழைப்பு இதில் இருக்கிறது,
கூடவே உன்னி உன்னி நான் பாய்ச்சிய சீவிதமும் . . .

-மகுடதீபன்

சொன்ன தென்னவோ செய்த தென்னவோ
சோகம் என்பதே சுகம்
தோற்ற மான உன் துணை கிடைக்கிற
சொந்தம் என்பதே நிஜம்

உன்னை அன்றியோர் உலகை எண்ணவே
ஒப்பு தில்லைஎன் உளம்
ஓடி வாஎனை ஆண்டுகொள்ளவே
உயிர்து டித்திடும் முனம்

பொன்னும் வேண்டினேன் பொருளும் வேண்டினேன்
புகழும் வேண்டினேன் இலை
போதும் உந்தனைப் போற்றி செய்யவே
புலம்பு கின்றதென் நிலை

தாள வில்லைஎன் தேவ தேவியே
தயவுகாட்டுவாய் முகம்
தனித்தி ருப்பதால் தவிப்ப டங்குமா
தாகம் கொண்டதே மனம்

நாள் முழுக்கநின் ஞாபகத்திலே
நயனம் கொண்டதோ கனம்
நலிவ கற்றிட நடை நடந்துவா
நான்இருக்கிறேன் தவம்

தோள் அசைத்துவா துடியி டைமெலத்
துவள ஆடிவாநடம்
துடிதுடிக் கிறேன் சுட்டு நோக்கிலே
துயர் துடைக்க வா இடம்

தாள் அசைத்து வா ஒற்றிக் கொள்கிறேன்
தாமரை திருப் பதம்
தந்த மாத்திரம் பவ விமோச்சனம்
தான்கிடைப்தோர் விதம்

போதும் போதும்இவ் விரக வாதனை
புரிகு தில்லையே வழி
பொன்ம கள்திரு வடிவம் எண்ணியே
பூத்தி ருந்தது விழி

பூத லத்தில்என் கலிமுடித் தருள்
பூ மழைத்துளி பொழி
பொலியும் நின்திரு உருவும் கண்டுநான்
புளகி தம்கொளப் புரி

நாத நாயகி நயன லாவணி
நமன் வராமலே அழி
நம்மைக் காத்தருள் நாட்டில் சேர்த்தருள்
நல்ல சேதியை மொழி

சேதி சொல்வது மட்டுமா அருட்
செயல் முடித்துளம் செழி
சிலிர்க்குமே மதி என்றும் என்னுடன்
சிறப்பு நேரமாய் களி

பாடல் பெய்கிறேன் படைப்பும் பெய்கிறேன்
பாவை வடிவமே கரு
பாடும் பாடலில் கனிந்து வந்த தே
பாசம் ஆகிய உரு

ஆடல் ஆம்கலை அமுதம் ஆகவே
அசைந்து வந்த தே திரு
அழகுக் கோர்புது அணி இலக்கணம்
ஆய் நடந்ததே உரு

வாடல் என்பதும் என்றும் இல்லைநீ
வழங்கும் கற்பகத் தரு
வருக என்உளம் அமர்கவே என
வார்த்தை கேட்குமுன் கொடு

தேடல்என்பதுன் உடன்பிறந்ததா
தேடுமுன் உற விடு
தேடு திரவியம் தேவையா இலை
சிறு விரல்களால் தொடு

நீ எனக்கடி நான் உனக்கடி
நெஞ்சிலே கவி படி
நினை நினைந்த தால் நனை நனைந்த என்
நீண்ட காவியம் முடி

வாய் எதற்கடி கேட்ப தற்கலோ
வருக வே மனைப் படி
வரவுக் காகவே வளர்கிறேன் எலாம்
வானவன் விதிப் படி

போய்மு டிந்தது காத்தி ருந்த நாள்
புலரும் காலையே விடி
பூம லர்க்கொடி யோடு வான்வலம்
போகும் நாள்எது குறி

ஈ எனக்கெனக் கேட்கும் முன்வர
எண்ணம் என்றுசொல் லடி
இனியும் தாமதம் என்று நீட்டினால்
இதய சோகமே வெடி

- ம கு ட தீ ப ன் . +91-9486102034

Herewith I am presenting the Bone Melting

Poems in Tamil on my Godess Sri Sivagami.

Will you dive deep and get baptized.

                          http://magudadheeban.110.mb.com